( بت هندسة ) رجعت أهلها والدموع عاملات مجرى من كترت البكا.. حكت لى أهلها الحاصل.
عمك ( أب شنب ) من الزعل شحن ليه 3 لوارى ( أدروبات ) من النوع ال مابتفاهم داك.. محجبين ومربطين بالسكاكين والمطاوى والسيوف.. أدروبات من النوع البقول ليك وينو؟ تقول ليهو ياهو دا.. ( جك ) يركب سكينو فى الزول.. ولااااااا بتفاهمو ⚔️
اللوارى إتحركت.. ( أب شنب ) راكب أول زول وشايل ليهو إستريو قدر الدولاب والغنية شغالة:
🎶 لبسو الهديمات عدلو
ركبو اللوارى و قبلو 🎶
اللوارى قامت دافرة.. والغبار للسماء.. والأدروبات ورا ينططو رافعين السيوف.. وعمك ( أب شنب ) راكب قدام يعضعض فى سنونو:
- والله الليلة يا ( العروف ) موش كان دخلت السجن ؛ كان دخلت جوا بطن أمك نجيبك.
_____________________________________________
اللوارى جن كاشحات شووووووو جوا السجن راس.. بس ربك رب الخير لطف والدنيا مولعة إعتصامات والخرطوم كلها شرطة و كوامر و دوريات.. لو ما كدا ( العروف ) كان إتلحس.
الأدروبات ديل بيييي سيوفهم تعبوا ليك الشرطة وناس مكافحة الشغب تعب شديد.. دوووورت حرب شعواء قدام السجن.. وبعد تعب وبمبان وضرب و مناتلة حتى قدرو يستوعبوا الموقف.. مسكوا الأدروبات كلهم إلا عمك ( أب شنب ).. إنسل برااااااحة جوا السجن.. لقى ليك الحتة خ خلا ( العساكر كلهم كانو مشغولين مع الأدروبات والشغب برا.. دخل لقى مفاتيح الزنزانات معلقة.. شالن ودخل على جوا.. يفتش زنزانة زنزانة على ( العروف ).. يلقى واحد نايم.. وواحد يشخبط فى الحيط..وواحد يطنطن ويتلفظ على ( البشير ) 🙈.. بس قبل آخر زنزانة سمع ليك ضحكات بصوت عالى وناس بتكلموا كللللهم فى وقت واحد ( زى سوق البصل).. رخى أضانه سمع ليك الجماعة:
- والله يا ( العروف ) خطر
وواحد تانى يقول:
- والله يا ( عروف ) ماك هين، رجعتها طوالى حار حار ؟
وتالت يقول:
- يازول كرامتك فوق كل شى، هم غاشنك لى شنو؟
الرابع قال:
- بس لكن يا ( العروف ) للدرجة دى انت ماعاوزها؟ تختار السجن عشان ماتعيش معاها؟
هنا ( العروف ) إنفقع بالبكا :
- أنا إتغشيت لكن، والسجن أرحم لي، أنا البت الشفتها حليوووووونة ورموشها يجرحن، إستايلها فرنسى وشعرها طوييييل وبيييييضا زى النجفة، أجى فى النهاية أعرس لي 4 نسوان في وقت واحد، أوديها وين دى أنا، أوديها وين؟
واحد نط من المساجين قال:
- أنا الهمدو لله ما إندى فيسة أسان ندخول نأرف بنات ( دكر ) زى دا
واحد تانى قال:
- كدى وصف لينا ( بت هندسة ) بتاعتك دي
بس مع نهاية كلامه عممممك ( أب شنب ) فتح الزنزانة وجا طاير يزبد:
- يوصفو ليك الروشتة بركة الشيخ ود الأمين
عممممك جا ناطى فى حنك الزول شقاهو نصين.. والكافوتى دور.. النصيحة عمك ما قصر.. كرفس ليك 4 بى بنية واحدة.. لكن زى مابقولوا ( الكترة تغلب الشجاعة )
المساجين جهجهو عمك.. دا يضرب بى جاى ودا بهناك و ( العروف ) مخلوع لابد ليه فى كوع.
بعد شوية جو العساكر جاريين و معاهم ضابط السجن ردمو ليك المساجين ديل كسر صاح.. و ساقو عمك ( أب شنب ) و ( العروف ) للضابط.
الضابط قال ل ( عروف ):
- نحن ح نفكك للناس ديل بعد ماعرفنا القصة كلها
( العروف ) قاعد يكورك :
- تفكنى؟ تفكونى كيف وأنا معترف بالتهم كلها
- يازول الليلة كان إعترفت لينا عاوز تقلب الحكومة برضه مارق مارق مع ( أب شنب )
( العروف ) دا نطط ليك عيونه فوق لما شاف ليك عمك ( أب شنب ) و الضابط سلمو على بعض وبقول :
- مااااقصرت يا جنابو
قال كدا و مد لى جنابو كيس أسود جابو واحد من الأدروبات من اللورى.. الضابط مسك الكيس فتحو و سنونو ديل كلهن ظهرن.. عمك ( أب شنب ) إمسح فى الدم من خشمو و قال:
- متين وخمسين مليون ، وكان جيت بورتسودان بس دق علي فى الرقم الأديتو ليك قبيل و ح نقوم بالواجب
الضابط إنبسط :
- تمام يا حاج
و أشَّر بى راسه لى واحد من العساكر.. العسكرى سلم ( العروف ) لى عمك ( أب شنب ).. عمك رفع ( العروف ) دا بى يد واحدة ختاه فى كتفه و مرق على اللوارى و ( العروف ) يكورك:
- أنا شيوعى، أنا كوز، أنا قلبت الحكومة، أنامع ( البشير)، أنا ضد البشير، أنا ضد أي زول
زووووووول قال ليه بتقول فى شنو مافى.. الأدروبات رفعوا ( العروف ) واللوارى دى دورت.. ( سلالاب ) راس .. ويا ( بت هندسة ) جاك عريس 🙈.
======================================
#تنويه:
- لو في واحدة إسمها في الفيس ( بِت هندسة) أو واحد مسِّمي نفسه ( أمير الظلام) بعتذر منكم كل الإعتذار لأنه ماقاصد أسخر من أي شخص و كل الإحترام لكل الأخوان و الأخوات في الفيس وكلنا عائلة واحدة.
- أهلنا و حبايبنا في ( بورتسودان) عامة ليهم كل الحب و الإحترام.. و لأهلنا (الأدوربات) الطيبين خاصة.. أخدناكم من جانب الجدية في حياتكم الإجتماعية و ليكم كل الود.
تمت
