رواية جرح غائر
البارت الثامن عشر
في كليه الصيدله
حمد الله علي سلامتك يانور ..الكليه والدنيا كلها نورت بوجودك
ندي قالت كلامها بدموع فرح لنور اللي اخداها في حضنها وبترحب لرجوعها الكليه بعد فتره غياب بسبب مرضها
نور بابتسامه وحب ..الله يسلمك يانودي ..ربنا يخليكي ليا ياحبيبتي ..والكليه منوره بوجودك فيها ياقمر انتي
ندي ابتسمت بفرحه وقالتلها ..تعالي نقعد شويه في الكافتريا لسه ساعتين علي اول محاضره ..نكون اتكلمنا شويه وحشني الكلام معاكي اوي
نور بابتسامه ..وانا اكتر والله ..يلا بينا
مشو وراحو عند الكافتريا وفي خلال ده كان زمايل نور بيسلموا عليها وبيرحبوا برجوعها
في الكافتريا قعدت نور وقدامها ندي اللي اتنهدت بارتياح ..هااا ايه بقا ياستي طمنيني عليكي الاول ..عامله ايه دلوقتي ..لسه في حاجه بتوجعك
نور ..الحمد لله ياندي ..احنا كنا فين ..بس لسه الجرح في دماغي سايب اثر وبصراحه شكله وحش اوي ده غير شعري اللي بيخف بسبب العلاج ..مش عارفه هرجع تاني ولا لا.. قالت اخر كلامها بحزن ..ورجعت كملت ..بس الحمد لله اني وصلت لكده اصلا ده انا شوفت الموت بعنيا والله
ندي بحنان ..ان شاء الله ياحبيبتي ترجعي احسن من الاول ..والمهم انك بخير فعلا وده بالدنيا ولا ايه .وبعدين انتي قمر في كل حالاتك اصلا
نور ابتسمت لصاحبه عمرها اللي دايما بتديها ثقه في نفسها وكلامها دايما بيطمنها
بس ابتسامتها اختفت لما سمعت سؤال ندي ليها
...الا قوليلي يانور صحيح كلام مامتك انك مصممه علي طلاقك من عاصم
نور بضيق ..ندي عشان خاطري بلاش تزعليني بعد ماكونت فرحانه اني رجعت الكليه ..متجبيش سيرته من فضلك
ندي بصتلها باستغراب ..نور هو انتي كرهتي عاصم فعلا
نور بتهرب من عنيها اللي محصراها بس نطقت بخنقه ..هو اللي عمله قليل ياندي سواء فيا او في ملك اللي كرهتني دلوقتي اضعاف بسببه
ندي ..نوور متهربيش من سؤالي كرهتيه ولا لسه بتحبيه
نور بصدق ..مقدرش اقولك اني كرهته ياندي والا هكون كدابه ..حب طفولتي ومرهقتي وشبابي مش هقدر امحيه في ثواني اكيد ..بس الاكيد ان مش هينفع اكمل معاه بعد اللي حصل
ندي بحزن علي حيرتها ...مش عارفه اقولك ايه والله يانور .دي حياتك وانتي حره فيها ..بس اسمعي نصيحتي وادي لعاصم فرصه خاصه انه رافض يطلقك وعطيكي مهله تفكري كويس ..ففكري كويس احسن ما تضيعي كل حاجه وتندمي خاصه انك اعترفتي انك لسه بتحبيه
نور بحزن ...ان شاء الله ياندي ..ربنا يسهل ..ياريت تقفلي الموضوع ده بقا وتتكلمي في حاجه تانيه
ندي حبت متديقاش اكتر من كده وفعلا حاولت تنسيها مؤقتا اللي هي فيه بتفكيرها بذكرياتهم ومواقفهم اللي تضحك سوا
عند عاصم في البيت قاعد في البلكونه في اوضته وسرحان في الاشئ
دخلت مامته وطبطبت عليه واتكلمت بحزن ...هتفضل مهموم كده وسرحان لغايه امتي ياعاصم ...اللي حصل كان قدر ونصيب ياحبيبي ولازم كلنا نرضي بيه وانت اولهم
عاصم اتنهد بتعب ...عارف يا امي انه نصيب ..بس ضميري بيوجعني اوي ومش عارف اهدي ..حاسس اني مخنوق اوي يا امي
ايمان بحنان ..انت ماكنش قصدك ان كل ده يحصل ياحبيبي ..هون علي نفسك ..وبعدين ملك هي اللي ماقبلتش بجوازك من نور حتي وهي عارفه الأسباب وده حقها واختيارها ..وهي اللي رفعت الخلع يعني مكنتش متقبلاك في حياتها تاني ولاحتي رضت تسمعك عشان كرامتها كانت الاهم وده برضوا حقها يبقي ده اختيارها يابني مش انت اللي طلقتها برغبتك
عاصم بخنقه ...بس انا ظلمتها اني اتجوزتها من الاول يا امي قبل ما تاكد من مشاعري ناحيه نور صداقه واخوه وبس ولاحب
ايمان بدموع من حزن ابنها وضيقته ردت كمحاوله لتهديته ...ارجع واقولك نصيب ياعاصم ..فياريت تهدي وتحاول تراضي نور عشان متظلمهاش هي كمان معاك اكتر من كده ..وملك والله بدعيلها من قلبي ربنا يسعدها ويطبطب علي قلبها بالخير
عاصم اخد نفس طويل وتكلم باحتياج ..ممكن تحضنيني يا امي حاسس اني تعبان اووي
ايمان شدته من ايديه وخدته في حضنها بكل قوتها وعلي لسانها.دعاها ليه ان يريح قلبه ويهدي اموره
في المستشفي عند ملك
في اوضه الكشف ملك بتكشف علي مريضه عندها خلصت وكتبتلها الادويه ووصتها بالراحه التامه
بعد ماخرجت السكرتيره قالتلها ان واحده عايزاها بره
ملك باستغراب وارهاق ..متقالتش مين
السكرتيره ..لا يادكتوره ادخلها ولا لا
ملك بهدوء ..تمام دخليها
بعد دقايق دخلت نور ووشها في الارض وعنيها حزينه
ملك لما شافتها اتصدمت واستغربت من سبب الزياره بس سمعت كلام نور ليها ...ممكن اقعد ..ولا مش عايزه تشوفيني ياملك
ملك بهدوء ..اتفضلي اقعدي مش هعوز اشوفك ليه ...مفيش بيني وبينك حاجه
نور رفعت عنيها ليها وبصت علي كلامها في سخريه ولا لا بس لقت مفيش تعابير علي وش ملك غير الهدوء وبس
اتنهدت بصعوبه وماكنتش لقيه كلام تقوله بس حاولت تقول اي حاجه معرفتش ...
ملك حاسه بيها فقالتلها ..ساكته ليه اتكلمي انا سمعاك
نور بحزن ..مش عارفه اقول ايه
ملك ضحكت ..اومال جايه ليه
نور بدموع اتجمعت في عنيها حاسه بقلبها بيدق نطقت بصعوبه ..انا اسفه
ملك ....علي ايه
نور بصتلها بضيق بتصعبها عليها بس لازم تقول اللي جايه عشانه ...انا والله ماكنتش اعرف انك صممتي علي طلاقك من عاصم غير لما خفيت ..عشان كونت تعبانه اوي ..ولما عرفت حسيت اني عايزه اجيلك ..واول مانزلت الكليه جتلك ياملك ..بالله عليكي ياملك وحيات حبكم انتي وعاصم اللي انا دمرته من غير ماقصد لترجعيله ..ووالله ماهسيبه غير لما يطلقني واخرج من حياتكم للابد
ملك كانت بتسمعها بهدوء مفيش علي وشها اي علامات سواء كره كالعاده او تاثر
استنت لما خلصت كلامها واتكلمت بجديه ..بصي يانور واسمعي كلامي كويس اوي ..انا وعاصم مستحيل نكون مع بعض تاني ..وسواء انتي كنتي السبب او لا فده كان هيحصل هيحصل ..عشان انا عمري ماكنت هكمل معاه وهو مش بيحبني ...اه متستغربيش عاصم محبنيش لو كان حبني في يوم مكنتيش هتكوني انتي الاولي عنده دايما ..بس للاسف ده كان بيترجمه انك اخته وانه حاسس بمسؤليه اتجاهك عشانكوا سوا طول عمركوا بس ده كان طول عمره حب ..حب وبس
نور كانت بتسمع كلامها وهي حزينه علي مصدومه علي مشاعر كتير مش عارفه توصفها ردت بصوت هامس..بس حتي لو بيحبني زي مابتقولي مينفعش نكمل مع بعض خاصه انك اتظلمتي برضروا معانا وانتي ملكيش ذنب ..انا مش وحشه والله ياملك
ملك ابتسمت واتكلمت بهدوء ..تعرفي يانور نصيحه مني ليكي وده انا مستغرباه اني قاعده دلوقتي وبنصحك ومش حاسه بكره ليكي بالعكس انا دلوقتي بشفق عليكي عارفه ليه
نور بدموع ..ليه
ملك ببساطه ..عشان انتي مش عارفه تعملي ايه ..تسامحي عاصم وتكملوا مع بعض وتحصلي علي حبك اللي طول عمرك بتتمنيه وعايزاه ..ولا ترفضي عشان تانيب ضميرك بسببي
سكتت شويه وهي مركزه مع نور اللي التشتت والحيره ملياها وكملت بحسم ...نصحتي ليك انك ترجعي لعاصم يانور عشان هو ميظلمش واحده معاه غيري وانتي متظلميش واحد تاني معاك
نور قامت من مكانها وراحت ناحيتها ومسكت ايديها واتكلمت بتوسل ...ارجوكي ياملك تسامحينا كلنا ..مكنش قصدتنا وجعك وخسارتك والله
ملك ...الايام بتنسي يانور صدقيني هيجي يوم واسامح ..وعلي فكره انا دلوقتي اتاكدت ان عاصم معتش احساسي بيه بنفس القوه بدليل اني مش حاسه بكره ليكي وانتي واقفه قدامي كالعاده ..الحمد لله عاصم هيخرج من قلبي وفي اقرب وقت اكييد
نور خرجت من عندها والحيره متملكه منها اكتر من الاول بتفكر في كلامها تديه فرصه ولا تبعد وترتاح من وجع قربه
بعد ساعه وصلت البيت ودخلت لقت عاصم قاعد مع امها وابوها
قلبها الملعون للمره الالف بيدق ليه وهو شايف نظره اللهفه في عيون عاصم ليها
قربت منهم وقالت السلام وهي بترسم البرود بصعوبه
ابو نور ..تعالي ياحبيبتي ..اتاخرتي ليه ..عاصم مستنيك من بدري عشان يطمن عليك
نور ردت بهدوء ...روحت مشوار بعد الكليه يابابا ...ووجهت كلامها لعاصم ببرود مصطنع ...مكانش فيه داعي تستناني كل ده وتتعب نفسك
عاصم باحراج بص لابوها وامها اللي اضيقوا من برودها واستاذنوا يسبوهم لوحدهم شويه عشان يتكلموا بحريه
عاصم قرب منها بعد ابوها وامها مامشوا وشد ايديها بعصبيه ناحيته ...ممكن اعرف انتي بتكلميني بالطريقه دي ليه وعايزه توصلي لايه بالضبط
نور بعدت ايديها عنه واتكلمت باستفزاز ..عايزه اوصل انك تطلقني وبس
عاصم بعصبيه ..وانا قولتلك مستحيل فاهمه ولا لا
نور بضيق ...مش فاهمه ومش عايزه افهم اي حاجه خالص ..انا عايزه اطلق منك وبس ..هو بالعافيه يا اخي
عاصم بقوه ..مش بالعافيه يانور ....نور انا بحبك
نور قلبها دق اوي لما سمعت كلمته نفسها زاد من غير ماتحس لقت نفسها بتنفجر في العياط الكلمه اللي نفسها تسمعها طول عمرها سمعتها بس مش مصدقاها خايفه يكون بيكدب عليها الثقه بقت مهزوزه بينهم
صدمه عياطها المفاجئ حس انه عايز يحضنها اوي في اللحظه دي وبالفعل اخدها في حضنه بكل قوته
سابها تعيط براحتها وتطلع كل اللي جواها بس همس في ودنها بحنان ..بتعيطي ليه دلوقتي
نور فاقت علي وضعهم وبعدت نفسها عن حضنه بصعوبه واتكلمت بدموع ورجاء ....مش مصدقاك ...بعيط عشان مش مصدقاك ....كان نفسي اسمع الكلمه دي اوي منك طول عمري ..بس دلوقتي مش واثقه فيك ..خايفه منك لتجرحني تاني...ارجوك ياعاصم لو فعلا بتحبني خلينا كل واحد يروح لحاله ..خلينا اصحاب زي ماطول عمرنا اصحاب ...خلينا نحدد هنقدر نعيش من غير بعض ولا لا
عاصم كان بيسمعها وحاسس بخنقه بسبب عدم ثقتها فيه قلبه وجعه ان الكلمه اللي اللي نطقها بصدق هي محستهاش ومصدقتهاش
خرج من تفكيره واتنهد بضيق ..ماشي يانور اللي انتي عايزاه هعمله ...هديكي الوقت اللي تحبيه واحنا بعاد عن بعض زي ما انتي عايزه ... سكت شويه لما سمع تنهيدها براحه ..وكمل بحسم ...ومستني قرارك الاخير هتكملي معايا ولا لا
بعد مرور 5 شهور
في بيت باين عليه الفخامه والزوق الراقي في اوضه من اوض البيت صوت الفرحه والحب واللهفه اللي بيتكلم بيهم امجد لملك كانوا مالين المكان
امجد كانت دموع الفرح في عنيه حاطط ايديه علي بطنها بيلمسها بحنان ورقه ...انتي بجد اللي بتقوليه ..مش قادر اصدق ياملك اني هكون اب من ابن منك انتي
ملك رفعت ايديه وباستها بحب واتكلمت بابتسامه ..لا صدق يا دكتور بعد 8 شهور بالضبط هيشرفنا احلي ابن لاحلي اب وزوج في الدنيا كلها
امجد قعد علي السرير وقعدها جنبه وبصلها بعشق ونطق بعدم تصديق ..مش قادر اصدق لغايه دلوقتي ياملك اني حلمي اتحقق وبقيتي مراتي ..وكمان هيجيلي ابن منك ..حقيقي انا اسعد واحد في الدنيا بسبب وجودك في حياتي
ملك بصتله بحب ونطقت بامتنان ...انا اللي محظوظه بيك وبوجودك جنبي يا امجد ..انت احسن زوج بجد والعوض اللي ربنا بعتهولي عشان يفرحني وكمل فرحته بوجود حته مني ومنك جوايا
امجد بابتسامه ..بتحبيني ياملك
ملك بصدق ..قولتلك يوم ماهديك موافقتي علي جوازنا هتكون انت اللي في قلبي وبس ..انت عيشتني فيه الكام شهر دول مشاعر وحب بسنين كتير اوي يا امجد ..انا حقيقي بحبك
